أوّل قصيدة ف مَصر شِعر/ مصطفى الجزار
إلى .. مصر
مبكتبش القصايد فيكى .. بالساهل
برغم ان القصايد فيكى .. تستاهل
وانا .. عمرى
ما كنت فى حرفتى .. عاجز ولا جاهل
لكن ساعه ما اقول .. انى هقول فيكى
آلاقى الحرف جوايا .. ما بين مقتول وبين قاتل
وعارفه .. كل ده من ايه ؟؟؟؟
باحس ان الكلام عنك .. سحابه عاليه فوق فوقى
وانا واقف على قلبى .. على حبى وعلى شوقى
وبرضه .. لسه مش طايل
ولما يقولوا غنى لها .. وقول الشعر فى عنيها
عشان يرضى عليك نيلها .. ويعدل بختك المايل
ارد بكل احساسى .. ما نيش قايل
يا مصر الشعر فى عنيكى .. ما هوش سطرين بيتقالوا
ولا موال بيتغنى .. وانا قايله ومتقاله
ولا شويه كلام شعارات .. بيتحطوا ويتشالوا
يا مصر الشعر فى عنيكى .. جبال عاليه وحمل تقيل
يشيله ابنك الفارس .. وانا لسه ما نيش فارس
لكن حاسس .. بأنى هبقى يوم هوا
ساعتها يا مه ... تبقى الكلمه من جوا
وابقى قد قول قلبى .. وأمد ايديا لإديكى
ساعتها بس استاهل .. اقول الشعر فى عنيكى
ليست هناك تعليقات:
إرسال تعليق